Stiven Tobar Valencia leikmaður íslenska landsliðsins og Benfica í Portúgal hefur ekkert leikið með félagsliði sínu síðustu vikur vegna meiðsla.

Stiven Tobar varð fyrir því óláni að fara úr axlarlið á æfingu liðsins á dögunum og hefur nú staðfest í samtali við Handkastið að hann sé á leið í aðgerð vegna meiðslanna á föstudaginn.

Stiven sem var að klára sitt þriðja tímabil með Benfica í Portúgal rennur út af samningi við félagið í sumar og viðurkennir að tímasetningin á meiðslunum sé ekki að hjálpa honum í leit af nýju félagi fyrir næstu leiktíð en fjallað hefur verið um það síðustu vikur og mánuði að Stiven gæti verið á förum frá félaginu.

Hann hefur ekki enn fundið sér félag fyrir næstu leiktíð en ljóst er að hann missir af upphafi næsta tímabils vegna aðgerðarinnar.

,,Þetta gerðist á æfingu þar sem öxlin bara hreinlega gaf sig, ég fór úr og í lið og nú er ljóst að ég þarf að fara í aðgerð," sagði Stiven í samtali við Handkastið en hann fer í aðgerð á föstudaginn í Portúgal og verður í endurhæfingu eftir aðgerðina þar í sumar.

Hann segist gera ráð fyrir því að vera frá keppni og æfingum í allt að fjóra mánuði eftir aðgerðina en um er að ræða hægri öxlina sem er jú einmitt skothöndin hjá Stiven.