Samningur Árna Braga Eyjólfssonar við Aftureldingu rann út í sumar en samkvæmt heimildum Handkastsins eru viðræður í gangi og vonast félagið til að ná samkomulagi við leikmanninn um að hann leiki áfram með félaginu.

Árni hefur verið einn af lykilmönnum Mosfellinga undanfarin ár og yrði mikilvægur hlekkur í uppbyggingu liðsins fyrir komandi tímabil.

Þá herma heimildir Handkastsins að Birkir Benediktsson sé kominn langt í samningaviðræður við uppeldisfélag sitt. Birkir, sem er uppalinn hjá Aftureldingu lék síðustu tvö tímabil með Wakunaga í Japan en sneri aftur til Íslands á síðasta tímabili og lék með FH í Olís-deildinni.

Ef af félagaskiptunum verður myndi Birkir snúa aftur í herbúðir Aftureldingar eftir tveggja ára viðskilnað við félagið og styrkja liðið sem stefnir hátt á komandi leiktíð með nýja þjálfara í brúnni.

Hrannar Guðmundsson og Ingimundur Ingimundarson voru ráðnir þjálfarar liðsins á dögunum. Ljóst er að félagið vinnur nú að því að móta leikmannahópinn fyrir næsta tímabil.