Línumaðurinn, Katrín Tinna Jensdóttir sem gekk í raðir Horsens í dönsku úrvalsdeildinni í sumar frá ÍR var með fullkomna nýtingu í sigri Horsens gegn HØJ í 2.umferð dönsku úrvalsdeildarinnar í gær á útivelli.

Katrín Tinna skoraði fjögur mörk úr öllum fjórum skotum sínum í leiknum en Horsens vann leikinn 30-34 en heimakonur í HØJ voru 14-13 yfir í hálfleik.

Það var jafnt á flestum tölum í seinni hálfleik allt þar til í stöðunni 29-29 en þá komu fjögur mörk í röð frá Horsens og sem gerðu út um leikinn og unnu að lokum eins og fyrr segir, fjögurra marka sigur 30-34.

Horsens tapaði illa í fyrstu umferðinni 21-33 gegn Viborg og var þetta því kærkominn sigur fyrir liðið. Katrín Tinna skoraði tvö mörk úr þremur skottilraunum í þeim leik og hefur því skorað sex mörk í fyrstu tveimur leikjum sínum í dönsku úrvalsdeildinni til þessa.

Liðið mætir Sonderjyske í næst umferð strax á miðvikudaginn en Sonderjyske er líkt og Horsens með tvö stig eftir fyrstu tvær umferðirnar.