Norska handknattleikssambandið tapaði um 123 milljónum íslenskra króna á því að halda hluta Evrópumóts karla í byrjun þessa árs. Tapið hefur vakið töluverða athygli í Noregi, ekki síst þar sem Svíar og Danir, sem héldu mótið ásamt Norðmönnum, komu út í hagnaði.

Niðurstaðan er sérstaklega áhugaverð þar sem Ísland, Noregur og Danmörk halda saman heimsmeistaramót karla árið 2031. Þá verður einn riðill og einn milliriðill leikinn hér á landi í glænýrri þjóðarhöll.

Norska sambandið hefur þegar brugðist við fjárhagsstöðunni með því að draga sig út úr baráttunni um að halda EM karla árið 2034. Fram undan eru þó tvö stór verkefni hjá sambandinu, EM kvenna 2028 og HM karla 2031 með Íslandi og Danmörku.

Tapið á EM kom þrátt fyrir góða aðsókn. Uppselt var á alla þrjá leiki norska landsliðsins í Bærum og fjölmargir Færeyingar lögðu leið sína til Noregs til að fylgja sínu liði eftir. Miðasala fór raunar fram úr áætlunum norska sambandsins en það dugði ekki til að koma mótshaldinu réttu megin við núllið.

Stór kostnaðarliður fólst í breytingum sem gera þurfti á Unity Arena í Bærum vegna mótsins. Kostnaður vegna þeirra nam á bilinu 156 til 182 milljónum íslenskra króna.

Norska sambandið hafði upphaflega gert ráð fyrir enn meira tapi, eða tæplega 189 milljónum króna. Gripið var til niðurskurðar þegar ljóst varð að fjárhagslegur stuðningur hins opinbera yrði minni en vonast hafði verið eftir.

Erik Langerud, formaður norska handknattleikssambandsins, segir fjárhagsniðurstöðuna því ekki hafa komið sambandinu í opna skjöldu. Eigið fé sambandsins er um 1,3 milljarðar íslenskra króna en hann segir ljóst að ekki sé hægt að halda áfram að ganga á það með þessum hætti.

„Þetta er ekkert ofurdramatískt. Niðurstaðan er í raun betri en áætlanir gerðu ráð fyrir. Við fórum inn í þetta verkefni með opin augun. En við getum ekki haldið svona áfram,“ sagði Langerud í samtali við VG.

Hann bendir jafnframt á að áhrif stórmóta verði ekki eingöngu mæld í bókhaldi handknattleikssambandsins. Slík mót geti aukið áhuga á íþróttinni, fjölgað sjálfboðaliðum og skilað verulegum tekjum inn í samfélagið.

Þar nefndi hann sérstaklega Færeyingana sem fjölmenntu til Noregs og eyddu meðal annars í flug, ferjur, gistingu, veitingar og aðra þjónustu. Langerud telur þó ákveðna skekkju felast í því að stórmót skili tekjum víða í samfélaginu á meðan fjárhagsleg áhætta sitji að stórum hluta eftir hjá mótshöldurunum.

„Það er eitthvað að þegar allir aðrir en skipuleggjendurnir græða,“ sagði Langerud.

Noregur hélt einnig hluta heimsmeistaramóts karla árið 2025 og þá var niðurstaðan um 45 milljóna króna hagnaður. Þar skipti hins vegar verulegu máli að norska ríkið lagði um 130 milljónir króna til mótshaldsins. Án þess framlags hefði einnig orðið tap á því móti. Norska sambandið kallar því eftir auknum stuðningi hins opinbera við stórmót og vinnur nú að nýrri nálgun varðandi framtíðarmót.

Það verður ekki síst áhugavert fyrir íslenskan handbolta að fylgjast með þeirri vinnu þegar nær dregur HM 2031, sem Ísland, Noregur og Danmörk standa saman að.