Lovísa Thompson og samherjar hennar í Benfica unnu öruggan tólf marka útisigur á Madeira SAD, 31–19, í portúgölsku 1. deildinni í gær. Á sama tíma tapaði GC Amicitia Zürich, lið Birgis Más Birgissonar, fyrir BSV Bern í svissnesku úrvalsdeildinni, 34–26.

Lovísa var í byrjunarliði Benfica en komst ekki á blað í leiknum. Benfica tók snemma frumkvæðið og var sjö mörkum yfir í hálfleik, 17–10. Yfirburðir gestanna jukust eftir hlé og niðurstaðan varð öruggur 31–19 sigur.

Benfica hefur farið af stað af miklum krafti, er enn ósigrað og situr í efsta sæti deildarinnar.

Leikur Bern og Zürich var jafnari framan af. Bern var þremur mörkum yfir í hálfleik, 17–14, en Zürich minnkaði muninn í 21–18 snemma í síðari hálfleik. Heimamenn svöruðu með sterkum kafla, komust í 24–18 og tryggðu sér að lokum átta marka sigur, 34–26.

Birgir Már Birgisson skoraði eitt mark í tapinu en Sven Ehrig liðisfélagi Birgis var markahæstur í leiknum með níu mörk.

Zürich hefur unnið tvo af fyrstu fimm leikjum sínum í svissnesku deildinni en tapað þremur. Liðið hóf tímabilið á sigrum gegn Stäfa og Basel en hefur síðan tapað fyrir Kadetten Schaffhausen, Wacker Thun og nú Bern.