Thea Imani Sturludóttir lék sinn 100. A-landsleik fyrir íslenska kvennalandsliðið um helgina þegar Ísland mætti Póllandi í síðari vináttulandsleik þjóðanna í Katowice.

Thea Imani fagnaði tímamótunum með því að skora sex mörk fyrir íslenska liðið sem mátti sætta sig við naumt 35-34 tap eftir spennandi viðureign. Hún var næstmarkahæst í íslenska liðinu á eftir Elínu Klöru Þorkelsdóttur sem skoraði níu mörk.

Thea Imani er aðeins tólfta íslenska handboltakonan í sögunni sem nær þeim merka áfanga að leika 100 A-landsleiki fyrir Íslands hönd.

Hún lék sinn 99. landsleik á fimmtudaginn þegar Ísland vann Pólland 35-32 og skoraði þrjú mörk í þeirri viðureign. Með þeim mörkum komst hún upp í 11. sæti yfir markahæstu landsliðskonur Íslands frá upphafi.

Fyrir leikinn í gær hafði Thea Imani skorað 227 mörk í 99 landsleikjum en með mörkunum sex er hún nú komin með 233 mörk í 100 landsleikjum.

Thea Imani er jafnframt leikreyndasti leikmaður núverandi landsliðshóps Íslands. Hún leikur með rúmenska liðinu SCM Universitatea Craiova.