Selfoss 2 og Fram 2 mættust í dag í Grill 66 deild karla á Selfossi.

Selfyssingar byrjuðu betur í leiknum og náðu yfirhöndinni. Um miðbik hálfleiksins jöfnuðust leikar og Framarar náðu svo að komast yfir í stutta stund.

Selfyssingar náðu svo vopnum sínum aftur á nýjan leik og þeir fóru inn til búningsherbergja með 3 marka forskot. 18-15 voru hálfleikstölur.

Seinni hálfleikur var jafn og spennandi og hart barist. Lítið var á milli liðanna. En Selfyssingar reyndust sterkari aðilinn á endasprettinum og Aron Leo Guðmundsson tryggði svo Selfyssingum sigur með marki í blálokin. Lokatölur 33-32.

Hjá Selfoss 2 voru Aron Leo Guðmundsson og Skarphéðinn Sveinsson markahæstir með 8 mörk. Garðar Freyr Bergsson varði 13 skot.

Hjá Fram 2 var Alex Unnar Hallgrímsson markahæstur með 10 mörk. Jóhann Ágústsson varði 14 skot.