Telur 90% líkur á að Afturelding vinni Grill66-deildina
Emma Elísa Jónsdóttir

Afturelding undir stjórn Sebastians Alexanderssonar er í kjörstöðu í Grill66-deild kvenna þrátt fyrir að einungis sé 16. nóvember en liðið er með sex stiga forskot á toppi deildarinnar eftir níu leiki með fullt hús stiga.

FH er í 2.sæti með 12 stig og Víkingur er í 3.sæti með 10 stig. Eftir sigur Aftureldingar gegn FH í toppslag deildarinnar á föstudagskvöldið er útlitið fyrir framhaldið hjá Mosfellingum afar bjart. Handkastið leitaði til gervigreindarinnar og spurði hana hverja hún telur líkurnar vera að Afturelding leiki í Olís-deild kvenna á næstu leiktíð út frá stöðu liðsins í dag.

Gervigreindin metur líkur liðsins á deildarsigri um 90 prósent eftir níu sigra í fyrstu níu leikjunum. Eitt lið vinnur sér beint þátttökurétt í Olís-deildinni á næstu leiktíð.

Matið byggir á stöðutöflunni, úrslitum og leikjunum sem eftir eru en er huglægt mat en ekki niðurstaða tölfræðilegs spálíkans.

Afturelding er með 18 stig og sex stiga forskot á FH eftir jafnmarga leiki. Víkingur er með tíu stig eftir átta leiki og getur því minnkað muninn í sex stig með sigri í leiknum sem liðið á til góða gegn Fram 2.

Það vegur þungt í matinu að Afturelding hefur þegar lagt báða helstu keppinautana að velli á útivelli. Mosfellingar unnu Víking 30–25 og höfðu betur gegn FH í Kaplakrika, 25–24.

Gervigreindin telur FH helstu ógnina við Aftureldingu. Þrátt fyrir sex stiga mun er markamunur FH aðeins tíu mörkum lakari, +42 gegn +52 hjá toppliðinu.

Enn eru tólf leikir eftir hjá Aftureldingu og því næg stig í pottinum til að baráttan geti opnast aftur. Liðið hefur þó komið sér í þá stöðu að tíu sigrar í síðustu tólf leikjunum myndu tryggja því efsta sætið. Afturelding endaði þá með 38 stig en hvorki FH né Víkingur getur náð fleiri en 36 stigum.

Rætt var um stöðuna í Grill66-deildinni í nýjasta uppgjörsþætti Handkastsins.

Nýjustu fréttir

HAFA SAMBAND

Handkastið.net

Handkastið er hlaðvarpsþáttur og fréttamiðill um íslenskan og erlendan handbolta.

Ritstjórar eru Arnar Daði Arnarsson og Styrmir Sigurðsson.


handkastid@handkastid.net

Scroll to Top