Red Bull hjálpar Odense að kaupa norskan þjálfara undan samningi
Kenneth-McDowell

Danska stórliðið Odense Håndbold hefur ráðið Norðmanninn Steffen Stegavik sem nýjan aðalþjálfara kvennaliðs félagsins. Stegavik kemur frá norska félaginu Sola HK en athygli vekur að Red Bull, einn helsti styrktaraðili Odense, kemur að fjármögnun þess að losa þjálfarann undan samningi sínum í Noregi.

Stegavik er 42 ára gamall og hefur skrifað undir þriggja og hálfs árs samning við Odense. Hann tekur við liðinu 1. janúar næstkomandi og verður því kominn til starfa hjá danska félaginu þegar seinni hluti tímabilsins hefst af fullum krafti.

Norðmaðurinn hefur vakið mikla athygli fyrir störf sín hjá Sola þar sem hann hefur byggt upp öflugt lið sem hefur meðal annars tryggt sér sæti í Meistaradeild Evrópu.

Odense hefur mikinn metnað og vill vera í fremstu röð í evrópskum kvennahandbolta. Félagið hefur því ákveðið að bíða ekki þar til samningur Stegavik við Sola rennur út heldur greiða fyrir að fá hann til starfa strax um áramótin.

Það sem gerir ráðninguna sérstaklega athyglisverða er að eigendur Odense og Red Bull koma að fjármögnun samkomulagsins. Slíkt er ekki algengt í handbolta þar sem kaup á þjálfurum undan samningi eru mun sjaldgæfari en í knattspyrnu.

Lasse Honoré, framkvæmdastjóri Odense, segir í tilkynningu félagsins að leit að nýjum þjálfara hafi verið löng og umfangsmikil. Frá fyrstu viðræðum hafi verið góður samhljómur milli Stegavik og forráðamanna félagsins.

Honoré þakkaði jafnframt eigendum félagsins og Red Bull sérstaklega fyrir fjárhagslegan stuðning sem gerði félaginu kleift að fá Norðmanninn til starfa strax í janúar. Europamester

Stegavik hefur þjálfað Sola frá árinu 2020 og á þeim tíma komið félaginu í fremstu röð í norskum kvennahandbolta. Hann mun þó ljúka störfum sínum hjá Sola með úrslitaleik norsku bikarkeppninnar 28. desember.

„Þetta var einfaldlega of gott tækifæri til að segja nei við,“ sagði Stegavik í samtali við norska miðilinn Stavanger Aftenblad.

Við þjálfaraskiptin færist Mark Strandgaard, sem hefur gegnt starfi aðalþjálfara Odense tímabundið, aftur í hlutverk aðstoðarþjálfara.

Stegavik er eiginmaður norsku landsliðskonunnar Camillu Herrem, sem leikur með Sola. Hún er samningsbundin norska félaginu út yfirstandandi tímabil og því er enn óljóst hvernig fjölskyldan mun haga búsetumálum sínum eftir flutning Stegavik til Danmerkur.

Nýjustu fréttir

HAFA SAMBAND

Handkastið.net

Handkastið er hlaðvarpsþáttur og fréttamiðill um íslenskan og erlendan handbolta.

Ritstjórar eru Arnar Daði Arnarsson og Styrmir Sigurðsson.


handkastid@handkastid.net

Scroll to Top