Barcelona vann öruggan 42–25 útisigur á Bidasoa í 10. umferð spænsku úrvalsdeildarinnar í handbolta í kvöld. Íslendingarnir Viktor Gísli Hallgrímsson og Janus Daði Smárason voru báðir í leikmannahópi Barcelona en Bidasoa mætir FH í Kaplakrika í vikunni. Viktor Gísli Hallgrímsson átti góðan leik í marki Barcelona og varði 15 skot af 39, sem gerir 38,5% markvörslu. Janus Daði Smárason skoraði tvö mörk fyrir Barcelona úr fjórum skotum. Barcelona hafði sjö marka forystu í hálfleik, 22–15, og bætti verulega í forskotið í síðari hálfleik. Lokatölur urðu 42–25 og sautján marka sigur Barcelona staðreynd. Aleix Gómez og Domen Makuc voru markahæstir Barcelona með átta mörk hvor en Mario Nevado skoraði sjö mörk fyrir Bidasoa. Barcelona er á toppi spænsku úrvalsdeildarinnar með fullt hús stiga eftir tíu leiki en Bidasoa situr í öðru sæti með 18 stig eftir jafnmarga leiki. Bidasoa á nú fyrir höndum ferð til Íslands þar sem liðið mætir FH í Kaplakrika í vikunni.

Handkastið er hlaðvarpsþáttur og fréttamiðill um íslenskan og erlendan handbolta.
Ritstjórar eru Arnar Daði Arnarsson og Styrmir Sigurðsson.