Það vakti athygli margra að Ólafur Brim Stefánsson hafi gengið í raðir Stjörnunnar í síðustu viku sama dag og liðið lék gegn ÍBV í 2.umferð Olís-deildarinnar. ÍBV vann leikinn með tíu mörkum og var Ólafur Brim í leikmannahópi Stjörnunnar og lék með liðinu í leiknum.

Stjarnan er í meiðsla vandræðum um þessar mundir auk þess sem Jón Ásgeir Eyjólfsson tók út leikbann í leiknum gegn ÍBV eftir rautt spjald sem hann hlaut í 1.umferðinni gegn Val.

Handkastið hafði samband við Hrannar Guðmundsson þjálfara Stjörnunnar og spurði út í félagaskipti Ólafs í Stjörnuna en Ólafur Brim lék með Herði í Grill66-deildinni á síðustu leiktíð en Handkastið hefur greint frá því að hugur hans leiti út fyrir landsteinana.

,,Óli hefur æft með okkur síðan í sumar þar sem hann var félagslaus og fluttur í bæinn. Ég held að það sé ekkert leyndamál að hann er að reyna koma sér út," sagði Hrannar og bætti við:

,,Við lentum í meiðsla vandræðum fyrir ÍBV leikinn og Jón Ásgeir var dæmdur í bann þannig hann gerði okkur greiða og var með okkur í leiknum gegn ÍBV og á sama tíma erum við að hjálpa honum að fá spil mínútur í kroppinn. Hvað þetta verður lengi og hvernig framhaldið verður er algjörlega óljóst. Við tökum einn leik fyrir í einu," sagði Hrannar.

Stjarnan tekur á móti HK í 3.umferð Olís-deildarinnar á föstudagskvöldið klukkan 19:00. Bæði lið eru stigalaus fyrir leikinn og því er mikið undir fyrir bæði lið.