Fyrirliði Fram á síðustu leiktíð, Magnús Öder Einarsson gekkst undir aðgerð á hné í vikunni og leikur ekkert með Fram á næstunni. Þetta staðfesti Einar Jónsson þjálfari Fram í samtali við Handkastið.

Magnús Öder var ekki í leikmannahópi Fram í 5.umferð efstu deildar karla í gærkvöldi gegn Aftureldingu er liðið tapaði með sex mörkum 35-29.

Ástæðan er einföld, Magnús fór í aðgerð á hné á miðvikudaginn og verður ekkert með Fram fyrr en í fyrsta lagi í febrúar ef allt gengur að óskum að sögn Einars Jónssonar þjálfara Fram.

Þetta er annar leikmaður Fram sem verður ekki meira með liðinu á næstu mánuðum því Marel Baldvinsson sleit krossband í síðasta mánuði. Þá er Rúnar Kárason að glíma við eymsli í kálfa en vonir standa til að hann geti leikið með Fram á næstunni.

Stutt er í Evrópuævintýri Fram hefjist en fyrsti leikur Fram í Evrópudeildinni verður þriðjudagskvöldið 14.október í Úlfarsárdalnum þegar Porto kemur í heimsókn.