Undanúrslitin um danska meistaratitilinn hófst í gær þegar Skanderborg hafði betur gegn GOG 38-35 eftir framlengdan leik og í Álaborg unnu heimamenn 19 marka sigur gegn Mors-Thy 40-21.

Með þeim sigri sló Álaborg met í Danmörku því aldrei áður í sögu úrslitakeppninnar í Danmörku hefur lið unnið svo stóran sigur í undanúrslitum keppninnar.

Álaborg stendur vel að vígi fyrir annan leik liðanna sem fram fer á laugardaginn en vinna þarf tvo leiki til að tryggja sér sæti í úrslitaeinvíginu.

Felix Möller var markahæstur í liði Álaborgar með sex mörk en tólf leikmenn Álaborgar skoruðu í leiknum.