Marc-Henrik Schmedt, framkvæmdastjóri Magdeburg, hefur tekið fyrir orðróm þess efnis að sænski landsliðsmaðurinn Felix Claar gæti snúið aftur til Álaborgar.

Claar, sem lék með Álaborg frá 2017 til 2023, hefur verið orðaður við endurkomu til danska félagsins. Hann er hins vegar samningsbundinn Magdeburg til ársins 2028.

„Ég get vísað því á bug. Felix Claar verður klárlega áfram í Magdeburg til ársins 2028. Við höfum heldur ekki verið í neinu sambandi við Álaborg,“ sagði Schmedt við Dyn í hálfleik í leik Magdeburg og Kiel.

„Ég held að þetta sé alls ekki eitthvað sem hann er að velta fyrir sér. Við erum enn með fullt af áformum hér næstu tvö árin.“

Álaborg hefur þegar tryggt sér Elias Ellefsen á Skipagøtu frá Kiel frá og með næsta sumri en Claar virðist ekki vera á leið sömu leið. Schmedt tók jafnframt fram að hann gæti vel séð fyrir sér að Claar yrði áfram hjá Magdeburg eftir að núverandi samningur hans rennur út árið 2028.