Íslendingaliðið í dönsku úrvalsdeildinni, TMS Ringsted hefur ákveðið að færa heimaleiki sína í dönsku úrvalsdeildinni í stærra íþróttahús utan Ringsted þar sem núverandi aðstaða félagsins uppfyllir ekki lengur þær kröfur sem gerðar eru til efstu deildar handboltans í Danmörku.

Heimaleikir TMS Ringsted verða leiknir í Slagelse.

Borgarstjórinn í Ringsted segist skilja ákvörðun handknattleiksfélagsins TMS Ringsted um að flytja heimaleiki sína úr bænum, þrátt fyrir að hann sé ósáttur við niðurstöðuna. Þetta kemur fram í viðtali við danska miðilinn SN.dk. 

Borgarstjórinn Klaus Hansen sagði ákvörðunina vissulega vonbrigði fyrir bæjarfélagið, stuðningsmenn og atvinnulífið í Ringsted, en hann skilji um leið að félagið þurfi betri umgjörð. Hann sagði sveitarfélagið hafa reynt að finna lausnir, en að fjárhagslegar og skipulagslegar áskoranir hefðu gert verkefnið erfitt. 

Forráðamenn TMS Ringsted hafa bent á að núverandi aðstaða setji félaginu skorður bæði hvað varðar áhorfendafjölda, viðburðahald og tekjumöguleika. Með flutningnum telja þeir sig geta styrkt rekstur félagsins og skapað betri umhverfi fyrir leikmenn, stuðningsmenn og samstarfsaðila. 

Málið hefur vakið töluverða umræðu í Ringsted þar sem félagið hefur lengi verið eitt af stærstu íþróttafélögum bæjarins. Margir óttast að flutningurinn geti haft áhrif á tengsl félagsins við bæjarfélagið, á meðan aðrir telja þetta nauðsynlegt skref til að tryggja framtíð félagsins í efstu deild.

Ísak Gústafsson og Guðmundur Bragi Ástþórsson gengu í raðir félagsins síðasta sumar og voru að ljúka sínu fyrsta tímabili með félaginu.