Füchse Berlin hélt áfram undirbúningi sínum fyrir komandi tímabil þegar liðið vann öruggan 57-26 sigur á SG Uckermark í æfingaleik í Schwedt.

Þrátt fyrir að þetta væri þriðji æfingaleikur liðsins á aðeins þremur dögum virtust leikmenn Nicolej Krickau hvergi nærri þreyttir. Þvert á móti buðu þeir áhorfendum í troðfullri Neue Zeit-íþróttahöllinni upp á sannkallaða handboltasýningu.

Þegar sigurinn var orðinn öruggur ákvað Krickau að gera tilraunir með leikmenn í óvenjulegum hlutverkum.

Markvörðurinn Andreas Palicka fékk að taka vítakast en tókst ekki að skora. Línumaðurinn Mijajlo Marsenic færði sig í skyttustöðu og einn besti leikmaður heims, Mathias Gidsel, fór óvænt í markið ásamt Leo Prantner.

Gidsel lét meira að segja til sín taka á milli stanganna og varði nokkur skot, þar á meðal vítakast sem reynt var að lyfta yfir hann.

Nicolej Krickau gerði grín að breytingunum eftir leik.

„Við vorum augljóslega mjög óánægðir með markvörsluna hjá Lasse Ludwig í fyrri hálfleik, þannig að við prófuðum Mathias Gidsel og Leo Prantner í markinu eftir hlé. Það gekk betur, sérstaklega hjá Leo.“

Hann bætti svo við um Palicka:

„Við klúðruðum nokkrum vítaköstum á síðasta tímabili og vildum því prófa Andreas Palicka. Hann sýndi mjög skýrt af hverju hann er ekki lausnin okkar.“

Þjálfarinn tók síðan fram í alvarlegri tón að markmiðið hefði fyrst og fremst verið að skemmta áhorfendum.

„Leikurinn var mjög skemmtilegur. Það var frábært að hitta stuðningsmennina og félögin á svæðinu. Við vonum að við höfum gefið áhorfendum, sérstaklega krökkunum, eftirminnilega upplifun.“

View this post on Instagram

A post shared by Füchse Berlin (@fuechse_berlin)