Barcelona vann alla sjö titlana sem voru í boði á síðasta tímabili en hefur misst tvo lykilmenn úr meistaraliðinu í sumar. Ludovic Fàbregas segir metnaðinn þó ekkert hafa minnkað og stefnan sé að endurtaka leikinn.

Stærsta skarðið er í markinu eftir að Emil Nielsen, sem var valinn besti leikmaður Evróputímabilsins 2025/26, gekk til liðs við Veszprém.

Barcelona heldur hins vegar Fàbregas, sem hlaut sjálfur viðurkenningu sem besti varnarmaðurinn á EHF Excellence Awards. Frakkinn gegnir gríðarlega mikilvægu hlutverki í hjarta varnar Barcelona og verður ekki síður mikilvægur þegar nýtt markvarðapar tekur við.

Sergey Hernández og Viktor Gísli Hallgrímsson mynda markvarðapar Barcelona á nýju tímabili og Fàbregas ætlar að gera sitt til að hjálpa þeim að aðlagast.

Nielsen er ekki eini lykilmaðurinn sem hefur kvatt Barcelona. Domen Makuc, sem var valinn besti leikmaður Final Four í Köln, er genginn til liðs við THW Kiel og Antonio Bazán er einnig farinn.

„Eins og á hverju ári þarf liðið að hefja vinnuna á ný með nýjum leikmönnum. Það er rétt að við höfum misst Emil, Domen og Antonio, sem voru mjög mikilvægir fyrir okkur bæði innan og utan vallar,“ sagði Fàbregas.

„Núna erum við með nýja leikmenn sem eru líka mjög spenntir fyrir því að spila fyrir Barça og vinna titla. Við þurfum að gleyma aðeins því sem við gerðum í fyrra og árin þar á undan og einbeita okkur að þessu tímabili því það verður gríðarlega krefjandi.“

Fàbregas hefur mikla trú á nýju leikmönnunum og segir mikilvægt að hjálpa þeim að komast hratt inn í hlutina.

„Janus og Sergey eru leikmenn með mikla reynslu úr Meistaradeildinni og það skiptir miklu máli, sérstaklega hjá liði eins og Barça. Við ætlum að reyna að sjá til þess að þeim líði eins vel og mögulegt er hjá okkur svo þeir geti sýnt sitt besta.“

Þrátt fyrir breytingarnar á leikmannahópnum er markmiðið hjá Barcelona það sama.

„Kröfurnar eru gríðarlega miklar frá upphafi til enda tímabilsins. Við höfum mörg markmið sem verður mjög erfitt að ná, en metnaðurinn er að vinna alla titlana. Ef það tekst ekki þá viljum við vinna eins marga og mögulegt er og spila vel.“

Carlos Ortega, þjálfari Barcelona, tekur undir metnað leikmanna sinna.

„Síðan ég varð þjálfari Barça höfum við komið fimm sinnum til Andorra og unnið þrjá Meistaradeildartitla. Það kostar ekkert að dreyma. Af hverju ættum við ekki að vinna annan?“

Þrátt fyrir brottför mikilvægra leikmanna telur Ortega að Barcelona hafi burði til að berjast aftur um alla titla.

„Það er skylda okkar. Við höfum misst mikilvæga leikmenn bæði inni á vellinum og í klefanum, en ég tel að við höfum fengið leikmenn og fært upp leikmenn úr varaliðinu sem geta komið í þeirra stað og staðið sig vel.“