Vilja setja nýtt áhorfendamet þegar Füchse Berlin kemur í heimsókn
Tosei Kisanuki / The Yomiuri Shimbun via AFP

Franska stórliðið Paris Saint-Germain ætlar sér að setja nýtt áhorfendamet í Meistaradeild Evrópu í handbolta þegar liðið tekur á móti Füchse Berlin í lokaumferð riðlakeppninnar þann 3. mars á næsta ári. Leikurinn verður færður í Accor Arena í París þar sem PSG mun leika í fyrsta sinn í Meistaradeildinni.

PSG hefur ákveðið að færa leikinn úr sínum hefðbundna heimavelli yfir í Accor Arena í von um að laða að enn fleiri áhorfendur og skapa sérstaka umgjörð í kringum viðureignina.

Markmið félagsins er að setja nýtt áhorfendamet fyrir leik í Meistaradeild Evrópu á franskri grundu.

Þetta verður í þriðja sinn í sögu PSG sem félagið leikur heimaleik í Accor Arena. Fyrsti leikurinn þar fór fram árið 2024 gegn PAUC Handball í frönsku úrvalsdeildinni en tæplega 15 þúsund áhorfendur mættu á þann leik.

Í maí 2026 lék PSG síðan gegn HBC Nantes í sömu höll fyrir framan rúmlega 11 þúsund áhorfendur. Leikurinn gegn Füchse Berlin verður hins vegar fyrsti heimaleikur félagsins í Meistaradeild Evrópu sem fram fer í Accor Arena.

Thierry Omeyer, fyrrverandi landsliðsmarkvörður Frakklands og núverandi framkvæmdastjóri PSG, segir ákvörðunina snúast um meira en aðeins einn handboltaleik.

„Við erum mjög ánægð með að geta haldið þennan stóra Evrópuleik gegn Füchse Berlin í Accor Arena. Þetta er frábært tækifæri til að bjóða stuðningsmönnum okkar upp á sérstaka upplifun í einni þekktustu íþróttahöll höfuðborgarinnar,“ sagði Omeyer.

Hann segir félagið jafnframt vilja nýta leikinn til að auka sýnileika handboltans í Frakklandi.

„Fyrir utan íþróttalega þáttinn sýnir þessi ákvörðun vilja okkar til að efla handboltann, auka sýnileika hans og kynna íþróttina fyrir nýjum áhorfendum.“

Omeyer vonast til þess að kvöldið verði eftirminnilegt fyrir félagið og alla handboltaáhugamenn. Leikur PSG og Füchse Berlin fer fram miðvikudaginn 3. mars 2027 og verður síðasti leikur liðanna í riðlakeppni Meistaradeildarinnar.

Nýjustu fréttir

HAFA SAMBAND

Handkastið.net

Handkastið er hlaðvarpsþáttur og fréttamiðill um íslenskan og erlendan handbolta.

Ritstjórar eru Arnar Daði Arnarsson og Styrmir Sigurðsson.


handkastid@handkastid.net

Scroll to Top