Jim Gottfridsson verður ekki í landsliðshópi Svíþjóðar fyrir komandi leiki í undankeppni Evrópumótsins í nóvember, samkvæmt heimildum sænska miðilsins Sportbladet.

Michael Apelgren, landsliðsþjálfari Svíþjóðar, tilkynnir landsliðshóp sinn síðar í dag en Svíar mæta Grikklandi og Lúxemborg í undankeppni EM.

Gottfridsson, sem er 34 ára gamall, hefur verið einn af lykilmönnum sænska landsliðsins undanfarinn áratug en framtíð hans með landsliðinu virðist nú í óvissu.

Gottfridsson yfirgaf ungverska stórliðið Pick Szeged á síðasta tímabili eftir að samningi hans við félagið var rift við óvenjulegar aðstæður. Hann ákvað í kjölfarið að snúa aftur til uppeldisfélags síns, IFK Ystad, sem leikur í næstefstu deild Svíþjóðar.

Þrátt fyrir að Gottfridsson hafi farið mikinn með Ystad á tímabilinu virðist það ekki duga honum til að halda sæti sínu í landsliðinu. Gottfridsson hefur áður lýst því yfir að hann stefni á að leika með Svíþjóð á Ólympíuleikunum í Los Angeles árið 2028.

Samkeppnin um stöðurnar í sænska landsliðinu er hins vegar mikil og hafa ungir leikmenn á borð við Nikola Roganovic og Axel Månsson vakið athygli með frammistöðu sinni.