Sigrún Erla Þórarinsdóttir, línumaður Stjörnunnar, sleit krossband í upphafi leiks liðsins gegn HK í 5. umferð Olís-deildar kvenna á dögunum og leikur ekki meira á þessari leiktíð.

Arnar Daði Arnarsson þjálfari Stjörnunnar og þáttastjórnandi Handkastsins, staðfesti þetta í nýjasta þætti Handkastsins. Sigrún Erla var ekki í leikmannahópi Stjörnunnar gegn KA/Þór um helgina vegna meiðslanna en KA/Þór hafði betur í þeim leik 32-28.

Sigrún Erla gekk til liðs við Stjörnuna frá Val í sumar. Hún hafði verið valin í æfingahóp U19 ára landsliðs Íslands sem kemur saman í vikunni undir stjórn Halldórs Stefáns Haraldssonar, en verður að draga sig úr hópnum vegna meiðslanna.

Stjarnan er á botni Olís-deildarinnar með tvö stig eftir töp gegn HK og KA/Þór í síðustu tveimur leikjum. Bæði lið voru án stiga fyrir viðureignir sínar gegn Stjörnunni og eru félögin þrjú því öll með tvö stig að loknum sex leikjum.