Danski landsliðsmaðurinn Rasmus Lauge verður frá keppni næstu fimm til sex vikurnar eftir að hafa fótbrotnað í leik Bjerringbro-Silkeborg gegn TMS Ringsted í dönsku úrvalsdeildinni á sunnudaginn.

Lauge þurfti aðstoð við að komast af velli eftir samstuð við mótherja og var í kjölfarið sendur á sjúkrahús í Viborg til frekari rannsókna.

Miklar áhyggjur af Lauge – Sendur á sjúkrahús eftir meiðsli

Nú hefur komið í ljós að Lauge brotnaði á dálkbeini, öðru tveggja beina í neðri hluta fótleggsins. Peter K. Berthelsen, íþróttastjóri Bjerringbro-Silkeborg, staðfesti við danska TV 2 að reiknað væri með að Lauge yrði frá keppni í fimm til sex vikur.

Þetta er mikið áfall fyrir Bjerringbro-Silkeborg sem hefur reitt sig á reynslu og gæði Lauge í sóknarleik liðsins. Hinn 35 ára gamli Lauge missir jafnframt af komandi landsliðsverkefni Danmerkur þar sem liðið mætir Spáni og Sviss í nóvember.

Lauge hefur glímt við ítrekuð meiðsli á undanförnum árum og eru þetta enn ein vonbrigðin fyrir leikmanninn sem hefur um árabil verið einn af lykilmönnum danska landsliðsins.

Bjerringbro-Silkeborg vann leikinn gegn TMS Ringsted, 31-30, en Íslendingurinn Ísak Gústafsson skoraði þrjú mörk fyrir Ringsted.