Línumaðurinn Sigurður Páll Matthíasson hefur vakið mikla athygli í Olís deild karla í vetur.

Hann hefur skorað 54 mörk í 7 leikjum fyrir Víkinga og er markahæstur í liði þeirra. Þessi 54 mörk setja hann í 7. sæti á lista yfir markahæstu leikmenn deildarinnar.

Sigurður Páll gerðist ekki línumaður fyrr en hann gekk upp í 3. flokk. Fram að því var hann alltaf leikstjórnandi í yngri flokkum. Einkar útsjónarsamur með mikinn leikskilning sem hefur hjálpað honum mikið þegar hann færði sig inn á línuna.

Sigurður Páll hefur verið í landsliðshóp U-20 ára landsliðsins og nú í september síðastliðnum var hann síðan valinn í 21 manna Elítuhóp HSÍ sem Snorri Steinn Guðjónsson A-landsliðsþjálfari valdi. Svo sannarlega framtíðarmaður og verður gaman að sjá hvernig næstu ár þróast hjá honum.

Handkastið heyrði aðeins í Sigurði Páli og fengum hann til að tjá sig um byrjunina á tímabilinu og það sem framundan er.

"Byrjunin á tímabilinu hefur verið bara fín þrátt fyrir að við hefðum viljað vera komnir með fleiri stig. Erum með svolítið mikið breytt lið frá því í fyrra og fengum virkileg góðrar styrkingar fyrir tímabilið og þeir leikmenn hafa komið mjög vel inn í hópinn þannig við eigum bara eftir að verða betri eftir því sem líður á tímabilið"

"Við gerum miklar kröfur á okkur sjálfa og stefnum að sjálfsögðu á að byrja að halda okkur uppi en halda áfram stigasöfnuninni og sjá hvar það skilar okkur í töflunni"

"Ég hef verið mjög ánægður með hvernig sjálfum mér hefur gengið í byrjun tímabilsins sérstaklega sóknarlega. Finnst ég eiga töluvert inni varnarlega þannig ég stefni að bæta mig þar eftir því sem líður á tímabilið"

Það stóð svo ekki á svörum hjá Sigurði þegar hann var spurður út í hvert hann stefnir í nánustu framtíð.

"Maður stefnir mjög hátt í þessu. Stefni á að gera allt í mínu valdi til þess að gera Víking aftur af stórveldinu sem það var í handbolta. Svo langar mig að sjálfsögðu að spila einhvers staðar úti" sagði þessi öflugi línumaður að lokum.