Atli Steinn Arnarson fór á kostum þegar ÍBV vann Stjörnuna, 31-26, í Olís-deild karla í Vestmannaeyjum í dag. Atli Steinn skoraði fjórtán mörk í leiknum, þar af tólf í síðari hálfleik, og var maðurinn á bak við viðsnúning heimamanna.

Stjarnan var tveimur mörkum yfir í hálfleik, 18-16, en Eyjamenn svöruðu með öflugum síðari hálfleik sem þeir unnu 15-8. Atli Steinn skoraði því tólf af fimmtán mörkum ÍBV eftir hlé og fleiri mörk en allt lið Stjörnunnar á þeim kafla.

Leikurinn var sveiflukenndur í fyrri hálfleik. Stjarnan komst í 4-2 en Eyjamenn tóku við sér og náðu þriggja marka forskoti, 10-7 og 11-8. Gestirnir náðu hins vegar aftur tökum á leiknum og fóru með tveggja marka forystu inn í búningsklefann.

Atli Steinn lét strax að sér kveða eftir hlé. Hann skoraði fyrstu fjögur mörk ÍBV í síðari hálfleik og kom heimamönnum yfir, 20-19. Eyjamenn bættu síðan í og komust í 23-19 eftir enn eitt markið frá Atla Steini.

Stjörnumenn gáfust þó ekki upp og jöfnuðu metin í 24-24. Liðin skiptust á að skora næstu mínútur og enn var allt í járnum þegar Jóhannes Björgvin jafnaði í 26-26 þegar rúmar sex mínútur voru eftir.

Þá lokaði ÍBV leiknum. Heimamenn skoruðu síðustu fimm mörkin, þar af Atli Steinn fjögur, og tryggðu sér fimm marka sigur. Atli Steinn skoraði jafnframt átta af síðustu níu mörkum Eyjamanna.

Magnús Dagur Jónatansson kom næstur Atla Steini í markaskorun ÍBV með fimm mörk. Kristófer Ísak Bárðarson og Sveinn José Rivera skoruðu fjögur mörk hvor.

Ísak Logi Einarsson var atkvæðamestur Stjörnumanna með tólf mörk og Jóel Bernburg skoraði fimm.

ÍBV er í sjötta sæti deildarinnar með tíu stig eftir níu leiki en Stjarnan situr í níunda sæti með fimm stig.