Füchse Berlin vann mikilvægan 32-29 útisigur gegn Eisenach í þýsku Bundesligunni á sunnudaginn eftir að hafa verið sex mörkum undir í hálfleik. Þrátt fyrir sigurinn hefur danski handboltasérfræðingurinn Bent Nyegaard miklar áhyggjur af stöðu liðsins og telur það vera allt of háð frammistöðu Mathias Gidsel.

Füchse Berlin hefur glímt við töluverð meiðslavandræði og að mati Bents Nyegaard er breiddin í leikmannahópnum ekki nægilega mikil.

Hann bendir einnig á að brotthvarf Lasse Andersson í sumar hafi haft áhrif á stöðu liðsins.

„Sigurinn gegn Eisenach var gríðarlega mikilvægur fyrir Füchse Berlin, en leikurinn sýnir líka að þeir eru í miklum vandræðum. Þeir hafa ekki nægilega breidd vegna meiðsla og misstu auk þess Lasse Andersson í sumar,“ sagði Nyegaard í samtali við TV 2 Sport.

Að sögn Nyegaard hefur Nicolej Krickau, þjálfari Füchse Berlin, úr fáum leikmönnum að moða vegna meiðslanna.

Það hefur orðið til þess að ábyrgðin á Mathias Gidsel er orðin gríðarlega mikil.

„Það er ekkert leyndarmál að Mathias Gidsel ber 80 til 95 prósent af liðinu um þessar mundir. Þeir eru gríðarlega, gríðarlega háðir því að hann standi sig. En hann er líka fær um það,“ sagði Nyegaard.

Füchse Berlin lenti í miklum vandræðum gegn Eisenach á sunnudaginn og var sex mörkum undir í hálfleik, 16-10.

Berlínarliðið náði hins vegar að snúa leiknum sér í vil í síðari hálfleik og tryggði sér að lokum þriggja marka sigur, 32-29.