Talant Dujshebaev, landsliðsþjálfari Frakklands reyndi á dögunum að fá Timothey N'Guessan, leikmann Barcelona, til að snúa aftur í franska landsliðið. N'Guessan hafnaði hins vegar beiðni landsliðsþjálfarans og ætlar að standa við ákvörðun sína um að hafa lagt landsliðsskóna á hilluna.

Þetta staðfesti Dujshebaev á blaðamannafundi franska landsliðsins en franska landsliðið undirbýr sig nú fyrir fyrstu leiki sína í undankeppni EM 2028.

N'Guessan, sem er 34 ára gamall, hefur verið í frábæru formi með Barcelona á tímabilinu og vildi Dujshebaev fá hinn reynslumikla leikmann aftur inn í franska landsliðið.

„Hann er í frábæru formi, það vita allir. En ég virði ákvörðun hans og sætti mig við hana,“ sagði Dujshebaev á blaðamannafundinum.

Hætti eftir að hafa verið skilinn eftir heima

N'Guessan tilkynnti í október árið 2024 að hann hefði ákveðið að hætta að leika með franska landsliðinu. Ákvörðunin kom nokkrum mánuðum eftir að Guillaume Gille, þáverandi landsliðsþjálfari Frakklands, hafði ekki valið hann í hópinn fyrir Ólympíuleikana í París.

N'Guessan á að baki 115 landsleiki fyrir Frakkland og hefur unnið alla stærstu titla sem í boði eru með landsliðinu. Hann varð heimsmeistari með Frökkum árið 2017, Ólympíumeistari í Tókýó árið 2021 og Evrópumeistari árið 2024.

Frakkland mætir Rúmeníu á morgun í fyrsta leik sínum í undankeppni EM 2028 áður en liðið heimsækir Lettland á sunnudaginn.

Dujshebaev tók við franska landsliðinu fyrr á þessu ári og hefur nú hafið undirbúning fyrir sitt fyrsta stórmót með liðinu.