Færeyjar og Króatía settu ný markamet í fyrstu umferð undankeppni EM 2028 í handbolta karla í gærkvöldi líkt og íslenska landsliðið gerði gegn Úkraínu í Laugardalshöllinni.

Allar þrjár þjóðirnar skoruðu fleiri mörk en þær höfðu áður gert í einum leik í undankeppni EM.

48 mörk og nýtt íslenskt met í undankeppni EM

Færeyingar unnu 37-30 sigur á Kósovó og bættu fyrra met sitt um tvö mörk. Þeir leiddu 20-13 í hálfleik og fór Óli Mittún fyrir sóknarleiknum með átta mörk úr jafnmörgum skotum. Gamla metið var frá maí 2025 þegar Færeyjar unnu Úkraínu 35-27.

Króatar bættu sitt met um sex mörk með 46-28 sigri á Litháen. Fyrra metið hafði staðið í rúm ellefu ár, frá því að Króatía vann Tyrkland 40-26 í júní 2015.

Ísland skoraði flest mörk allra liða á fyrsta leikdegi undankeppninnar þegar liðið vann 48-26 sigur á Úkraínu í Laugardalshöll. Þar með féll metið frá júní 2011 þegar Ísland vann Austurríki 44-29. Bjarki Már Elísson og Ómar Ingi Magnússon voru markahæstir hjá Íslandi með sex mörk hvor.