Þrjú Íslendingalið voru í eldlínunni í kvöld í bæði Danmörku og Svíþjóð en bæði Holstebro og Sävehof unnu sterka sigra á meðan Karlskrona þurfti að lúta í lægra haldi á útivelli. Lærisveinar Arnórs Atlasonar í TTH Holstebro unnu góðan útisigur í dönsku úrvalsdeildinni þegar liðið mætti Kolding en lokatölur í miklum markaleik urðu 37-39. Jóhannes Berg Andrason átti fínan leik fyrir gestina en hann skoraði sex mörk úr níu skotum og gaf fjórar stoðsendingar á meðan Benedikt Gunnar Óskarsson lét lítið fyrir sér fara að þessu sinni. Holstebro sitja í níunda sæti deildarinnar en eru núna aðeins tveimur stigum frá áttunda sætinu sem gefur sæti í úrslitakeppni. Í Svíþjóð unnu Sävehof gríðarlega sterkan og mikilvægan heimasigur á Malmö en lokatölurnar urðu 30-27. Birgir Steinn Jónsson skoraði eitt mark úr einu skoti og gaf tvær stoðsendingar að auki. Sävehof eru í fjórða sæti deildarinnar með fimmtán stig og aðeins stigi á eftir toppliðunum Alingsås og Malmö. Karlskrona var einnig í eldlínunni í kvöld en þeir mættu Helsingborg á útivelli. Heimamenn reyndust töluvert sterkari í kvöld og unnu þægilegan sjö marka sigur, 30-23. Karlskrona hafa átt erfitt uppdráttar að undanförnu og sitja í ellefta sæti deildarinnar með aðeins sjö stig, sex stigum frá topp átta sem gefa þátttökurétt í úrslitakeppnina. Arnór Viðarsson skoraði tvö mörk úr fjórum skotum, gaf fjórar stoðsendingar og fékk eina brottvísun að auki fyrir gestina í kvöld. Úrslit kvöldsins: Kolding 37-39 Holstebro Sävehof 30-27 Malmö Helsingborg 30-23 Karlskrona

Handkastið er hlaðvarpsþáttur og fréttamiðill um íslenskan og erlendan handbolta.
Ritstjórar eru Arnar Daði Arnarsson og Styrmir Sigurðsson.