Vinstri hornamaður ÍBV, Jakob Ingi Stefánsson leikur ekki meira með liðinu á þessu tímabili en hann staðfesti í samtali við Handkastið nú rétt í þessu að hann væri með slitið krossband.

Jakob Ingi sleit krossband á æfingu með ÍBV í síðustu viku en hann gekk í raðir félagsins eftir sex tímabil með Gróttu.

,,Þetta eru glataðar fréttir. Loksins þegar maður fer kominn í topplið þá gerist þetta. Þetta er alveg hörmulegt,” sagði Jakob í samtali við Handkastið miður sín eftir að hafa fengið fregnirnar í morgun.

,,Ég var bara að fara inn úr horninu eftir hraðarupphlaup á æfingu og lenti á vinstri fætinum og var að snúa til að hlaupa í vörn. Þá snéri ég líkamanum en ekki löppinni sem varð eftir og þá gaf krossbandið sig og eitthvað meira í leiðinni,” sagði Jakob sem segir það ekki enn vera komið á hreint hvað fór meira í hnénu.

Þetta eru slæm tíðindi fyrir ÍBV en Jakob Ingi hafði farið vel af stað á tímabilinu en ÍBV mætir ÍR í 9.umferð Olís-deildar karla á fimmtudagskvöldið næstkomandi með laskað lið svo vægt sé til orða tekið.