Hrikalega mikilvægur leikur fer fram í Olís-deild karla í kvöld þegar ÍR og Þór mætast í alvöru botnbaráttuslag í 12.umferðinni. Leikurinn fer fram í Skógarselinu og hefst klukkan 18:30 og verður í beinni í Handboltapassanum.

ÍR er á botni Olís-deildarinnar með þrjú stig á meðan Þórsarar er með fjórum stigum meira í sætinu fyrir ofan.

Fyrirliði ÍR, Sveinn Brynjar Agnarsson sendi stuðningsmönnum ÍR skilaboð í vikunni þar sem hann hvatti ÍR-inga til að fjölmenna á leikinn í kvöld.

,,Kæru ÍR-ingar, á laugardaginn mætum við Þórsurum í fyrsta leik seinni helmingsins í Olís-deildinni. Eins og flestir vita er leikurinn mjög mikilvægur og erum við strákarnir staðráðnir í að sækja fyrsta sigur vetrarins. Við þurfum því á ykkar hjálp að halda úr stúkunni og við hvetjum alla ÍR-inga til þess að fjölmenna á leikinn og hjálpa okkur í baráttunni,” sagði Sveinn Brynjar.

Það verður afar spennandi að sjá hvort ÍR-ingar fjölmenni á sinn heimavöll í kvöld í gríðarlega mikilvægum leik fyrir bæði lið, þá einkum fyrir ÍR-liðið en Handkastið ræddi um það í síðasta þætti sínum að tímabilið væri undir hjá liðinu í næstu tveimur leikjum.