Enn eina ferðina var ekki boðið uppá HB Statz tölfræði úr Mosfellsbænum þegar Afturelding gjörsigraði Hauka í toppbaráttuslag í 12.umferð Olís-deildar karla á fimmtudagskvöldið.

Stymmi klippari hótaði því að senda Skolphreinsun Ásgeirs í Mosfellsbæinn þrátt fyrir sigurinn enda með öllu óboðlegt að félag eins og Afturelding geti ekki mannað tölfræði í leikjum í Olís-deild karla aftur og aftur. Rætt var um þetta í nýjasta þætti Handkastsins þar sem æðstu menn innan Aftureldingar voru beðnir um að taka þessu alvarlega og koma þessu í lag.

,,Við ætlum að senda smá pillu upp í Mosfellsbæ. Vinsamlegast komið HB Statz í lag hjá ykkur, það hefur ekki verið HB Statz tölfræði í boði úr heimaleikjum Aftureldingar í töluverðan tíma, þetta er hundleiðinlegt fyrir okkur sem elskum tölfræði. Ég veit að það eru ekkert allir sem eru að spá í þessari tölfræði en ég elska að skoða tölfræði."

,,Sjáum hvað gerist um helgina, þrír dagar eru langir í handbolta en Skolphreinsun Ásgeirs kemur til okkar á mánudag og við sjáum til hvert við sendum þá,” bætti Stymmi klippari við.

Benedikt Grétarsson sem var gestur í Handkastinu hvatti Einar Inga Hrafnsson framkvæmdastjóra Aftureldingar að kippa þessu í lag sem fyrst.