Örvhenta skyttan, Mathias Gidsel leikmaður Fuchse Berlínar og miðjumaðurinn Henny Reistad leikmaður Esbjerg eru handknattleiksfólk ársins 2025 að mati Handknattleikssbamands Evrópu, EHF.

Emil Nielsen og Stine Oftedal fengu þessa nafnbót á síðasta tímabili.

Spánverjinn, Ian Barrufet sem lék á láni með Melsungen í vetur og Svissverjinn, Mia Emmengger leikmaður Esbjerg líkt og Henny Reistad voru valin efnilegustu leikmenn Evrópu.

Mathias Gidsel fór á kostum með liði Fuchse Berlín í vetur sem urðu Þýskalandsmeistarar i fyrsta skipti í sögunni og fóru alla leið í úrslit Meistaradeildarinnar þar sem liðið tapaði gegn Magdeburg. Gidsel var valinn MVP á HM 2025 þar sem hann var einnig markahæsti leikmaður mótsins með 74 mörk. Hann var einnig með flestar stoðsendingar á HM. Þá var Gidsel einnig valinn MVP í þýsku Bundesligunni.

Gidsel var valinn besti leikmaður heims af IHF fyrir árið 2024, í annað sinn. Gidsel skoraði 135 mörk í Meistaradeildinni á tímabilinu, þar af níu mörk í úrslitahelginni þrátt fyrir að hafa fengið rautt spjald snemma leiks í undanúrslitaleiknum.

Henny Reistad var næstmarkahæsti leikmaðurinn á EM 2024 þegar Noregur vann gullið, þá var hún með flestar stoðsendingar á mótinu og var valin í úrvalslið mótsins. Í Meistaradeild Evrópu var Reistad markahæsti leikmaður keppninnar með 154 mörk fyrir Esbjerg og en hún skoraði alls 15 mörk í úrslitahelginni sjálfri. Er hún markahæsti leikmaður í sögu úrslitahelgarinnar með alls 94 mörk. Að auki endurheimti Reistad titilinn sem besti handboltamaður heims hjá IHF á síðasta ári.