Ágúst Ingi Óskarsson leikmaður Aftureldingar verður frá keppni næstu vikurnar í það minnsta vegna nárameiðsla sem hann hlaut í leik með Aftureldingu gegn FH í Powerade-bikarnum fyrir jól.

Ágúst Ingi hefur ekkert æft með Aftureldingu í janúar og var ekki í leikmannahópnum í fjögurra marka tapi liðsins gegn Fram á fimmtudagskvöldið í 16.umferð Olís-deildar karla.

Ágúst Ingi sagði í samtali við Handkastið að hann vonaðist eftir því að geta fengið meðhöndlun á meiðslum sínum hjá læknum á næstunni sem myndu vonandi hjálpa til við að ná bata. Hann gerir hinsvegar ráð fyrir því að missa af næstu tveimur leikjum Aftureldingar í Olís-deildinni.

Afturelding fær Val í heimsókn í Mosfellsbæinn í dag klukkan 15:30 í 17.umferð Olís-deildar karla og fer síðan til Vestmannaeyja á fimmtudaginn í næstu viku.

Ágúst Ingi gekk í raðir Aftureldingar í sumar eftir veru sína hjá Gróttu síðustu tímabil.