Álaborg urðu í dag danskir bikarmeistarar þegar þeir unnu nokkuð öruggan og þægilegan sigur á Íslendingaliði Ringsted. Lokatölur urðu 34-24 fyrir dönsku meistarana sem einfaldlega ráða lögum og lofum yfir dönskum handbolta þessa stundina en þeir hafa ekki tapað stigi í deildinni það sem af er og þeir kláruðu bikarinn nokkuð örugglega.

Niklas Landin var valinn besti leikmaður leiksins en hann átti hreint út sagt magnaða frammistöðu í marki Álaborgar. Hann gerði sér lítið fyrir og varði 13 af þeim 25 skotum sem hann fékk á sig í leiknum.

Sem gerir rúmlega 56% markvörslu sem er með hreinum ólíkindum í bikarúrslitaleik.

Landin sem verður 38 ára í desember á þessu ári hefur lagt landsliðskóna á hilluna en það hefur ekki haft áhrif á danska landsliðið en á ferlinum vann hann til sex gullverðlauna á stórmótum með danska landsliðinu og vann alls til tólf verðlauna með danska landsliðinu á stórmótum.

Hann gekk í raðir Álaborgar frá Kiel sumarið 2023 og hefur sankað að sér titlunum frá því hann kom til Álaborgar.