KA þurfti að bíta í það súra epli að falla úr leik í Powerade-bikarnum eftir tap gegn ÍR með einu marki í undanúrslitum í kvöld. KA var meira og minna undir allan leikinn í kvöld en fyrirfram var búist við sigri KA í leiknum gegn botnliði ÍR í Olís-deildinni.

,,Ég er mjög svekktur og hundfúll. Við vorum lélegir í dag en ég vil óska ÍR til hamingju, þetta var fúlt," sagði Andri Snær Stefánsson þjálfari KA í viðtali við Handkastið eftir leik.

,,Við náðum ekki að stjórna okkar hlutum fyrr en alltof alltof seint í leiknum en þetta er margþætt. Við byrjuðum sóknarlega afleitlega og vorum mjög hikandi og ragir. Síðan þegar sóknin fer að rúlla þá erum við í basli varnarlega. Jökull skýtur okkur í kaf og við vorum ekki alveg að tengja en síðan fannst mér vörnin vera að smella á köflum en síðan skora þeir mörg mörk þegar höndin er komin upp hjá dómurunum og svo framvegis, það var svekkjandi."

KA komst yfir í fyrsta og eina skiptið í leiknum í stöðunni 29-28.

,,Síðan erum við komnir með mómentið með okkur og komnir yfir og fáum 3-4 dauðafæri í sömu sókninni til að komast aftur yfir þegar 1 og hálf mínúta var eftir. Við getum verið svekktir að hafa ekki lokað þessu. Við vorum bara ekki nægilega góðir í dag og það svíður gríðarlega. Við vissum að ÍR-ingarnir eru stórhættulegir og eru með þannig byssur að ef þeir fá sjálfstraust og fá sín skot, sinn hraða og sín svæði þá eru þeir drullu erfiðir."

Viðtalið í heild sinni er hægt að sjá hér að neðan.