Bjarni Fritzson þjálfari ÍR getur gengið stoltur frá borði eftir úrslitahelgina í Powerade-bikar karla þrátt fyrir sjö marka tap gegn Haukum í úrslitaleiknum í kvöld, 28-21. ÍR kom flestum á óvart og sló út KA í undanúrslitunum en mætti stærri liði Hauka í kvöld.

ÍR-ingar urðu fyrir mikilli blóðtöku í undanúrslitaleiknum þegar þeirra langmarkahæsti leikmaður síðustu tveggja tímabila í Olís-deild karla, Baldur Fritz Bjarnason meiddist í upphafi leiks gegn KA og var ekkert með liðinu í kvöld. Bjarni segir að það geti að einhverju leiti útskýrt sóknarleik ÍR í fyrri hálfleik en Haukar voru 14-6 yfir í hálfleik.

,,Ég er ekkert smá stoltur af þeim. KA leikurinn var algjörlega stórkostlegur en þetta var erfiður leikur. Haukar eru með frábært lið og voru verðskuldað betri en við í dag," sagði Bjarni í viðtali við Handkastið eftir leikinn í kvöld.

,,Það er stutt á milli leikja og þeir eru með töluvert stærri hóp en við. Það voru nokkrir hjá þeim sem spiluðu lítið á fimmtudaginn og mættu hingað ferskir. Ef þú horfir á töfluna þá eru þeir töluvert betri en við. En fyrir mig var þetta ómetanleg reynsla fyrir strákana, ég er ótrúlega þakklátur fyrir tækifærið og fara í gegnum þetta ferli með þeim. Við erum snemma í ferðalaginu okkar og erum að byggja upp frábæra handboltadeild hjá ÍR og þetta var gott stop í þeirri vegferð, smá prófraun og síðan heldur vinnan áfram."

Viðtalið í heild sinni við Bjarna er hægt að sjá hér að neðan.