Tæplega hálfu ári eftir alvarleg meiðsli í öxl er hægri hornamaðurinn í liði Álaborgar, Patrick Wiesmach nú nálægt því að snúa aftur á völlinn.

Hann meiddist illa á öxl í Meistaradeildarleik á útivelli gegn norska liðinu Kolstad í byrjun október á síðasta ári. Eftir það fór hann í aðgerð og síðan tók við langt endurhæfingar tímabil. Nú virðist sá kafli vera að nálgast endalok.

Í kjölfarið samdi Álaborg við Alec Smit sem var án félags en búsettur í Danmörku en Hollendingurinn varð fyrir því óláni að slíta krossband á dögunum.

Samkvæmt nýjustu upplýsingum frá Álaborg gengur endurhæfingin vel hjá Wiesmach og er hann sagður væntanlegur aftur á völlinn hvað úr hverju.

Patrick Wiesmach er 35 ára danskur hægri hornamaður sem fagnar 36 ára afmæli sínu 23.mars næstkomandi. Hann gekk í raðir Álaborgar sumarið 2023 eftir fimm ár hjá SC DHfK Leipzig í Þýskalandi. Hann er alinn upp hjá Álaborg og hefur leikið tæplega 30 landsleiki fyrir danska landsliðið.