Deildarkeppnin í Danmörku er lokið og framundan er átta lið úrslitakeppni þar sem átta efstu liðunum hefur verið skipt upp í tvo fjögurra liða riðla.

Deildarmeistarar Álaborg hefja riðlakeppnina með tvö stig og Skanderborg sem endaði í 2.sæti deildarkeppninnar hefja einnig riðlakeppnina með tvö stig í sínum riðli.

Í riðlinum með Álaborg er liðið sem endaði í 3.sæti, 5.sæti og 8.sæti en með Skanderborg í riðli eru liðin sem enduðu í 4.sæti, 6. og 7.sæti.

GOG sem endaði í 3.sæti byrjar með eitt stig og TTH Holstebro undir stjórn Arnórs Atlasonar hefja einnig leik með eitt stig eftir að hafa endað í 4.sæti í deildarkeppninni. Spiluð er tvöföld umferð áður en tvö efstu liðin í hvorum riðli fyrir sig fara í undanúrslit og svo loks bíður úrslitarimma þeirra lið sem hafa betur í undanúrslitunum.

Í febrúar birti undirritaður grein á Handkastinu þar sem hann velti fyrir sér hvort kominn væri tími á að breyta fyrirkomulaginu í úrslitakeppninni hér á landi og fara dönsku leiðina. Nú styttist í ársþing HSÍ og fróðlegt verður að sjá hvort eitthvað félag hér á landi leggi fram tillögu um breyta úrslitakeppni en mörgum finnst tímabilið of stutt hér á landi fyrir þau félög sem komast ekki í úrslitakeppnina og einnig fyrir þau félög sem gætu farið í sumarfrí í dag eða á morgun tapi liðin 2-0 í 8-liða úrslitunum.

Í dönsku leiðinni eru átta efstu liðin í það minnsta búin að vinna sér sinn þátttökurétt í sex leikjum í riðlakeppninni sem væri þá fjórum leikjum meira en mörg lið fá hér á landi. Með því gæti tímabilið verið að lengjast í 3-4 vikur fyrir liðin hér á landi.

Í 14 liða úrvalsdeild í Danmörku fellur eitt lið beint niður. Liðin í 9.-13.sæti fara hinsvegar öll í einn riðil þar sem neðsta liðin í þeim riðli fer í umspilsleik gegn liði úr 1.deildinni.

Þar hefja liðin í 9. og 10.sæti riðlakeppnina með tvö stig, 11. og 12.sætið byrja með 1 stig og 13.sætið byrjar riðlakeppnina með 0 stig en það er HÖJ Elite að þessu sinni sem er með 0 stig þegar riðlakeppnin um fall fer af stað.