Líkt og kom fram í dag þá hefur Atli Steinn Arnarson, 22 ára Hafnfirðingur, og fyrrum leikmaður Gróttu samið við ÍBV.

Atli Steinn er uppalinn í Haukum en færði sig síðan yfir í FH. Var hann einnig um tíma á láni hjá HK áður en hann fór til Gróttu sumarið 2024. Atli Steinn er rétthent skytta sem skoraði 57 mörk í 11 leikjum með Gróttu í vetur í Grill 66 deildinni.

Við heyrðum aðeins í Atla Steini í dag eftir að þetta var tilkynnt að hann væri á leiðinni til Eyja og fengum hans viðbrögð við félagaskiptunum.

"Ég er virkilega ánægður að ganga til liðs við ÍBV. Þetta er mjög spennandi tækifæri fyrir mig að flytja á Eyjuna fögru og fá að spila með ÍBV. Það verður frábært að byrja að æfa hjá Erlingi og fá að kynnast liðinu, umhverfinu og fólkinu í Eyjum. Ég er mjög spenntur fyrir því að spila fyrir ÍBV og leggja mitt af mörkum fyrir félagið" sagði Atli Steinn Arnarson.