Stórveldin í Ungverjalandi, Veszprém og Pick Szeged mættust í dag í undanúrslitum bikarsins þar í landi en úr varð magnaður leikur sem heimamenn unnu á endanum í vítakastkeppni, 33-32.

Íslendingarnir í báðum liðum, Bjarki Már Elísson í Veszprém og Janus Daði Smárason í Szeged voru að sjálfsögðu með í dag eins og svo oft áður. Bjarki Már átti frábæran leik fyrir heimamenn en hann skoraði tíu mörk úr tólf skotum þar af sex úr vítum á meðan Janus Daði skoraði þrjú mörk úr sex skotum en hann endaði á því að vera skúrkurinn ef svo má segja því hann klikkaði á seinasta vítinu fyrir Szeged sem markmaður Veszprém, Mikael Appelgren varði frábærlega.

Úrslitaleikurinn fer fram á morgun en þá mæta Veszprém annað hvort Tatabánya eða Moly Neka sem eigast við þessa stundina en fastlega má búast við sigri Veszprém.