Það ræðst í Heklu-höllinni í kvöld hvort Stjarnan eða Grótta leika í Olís-deild kvenna á næstu leiktíð en staðan er jöfn 2-2 í einvíginu. Leikurinn í kvöld hefst klukkan 19:30 og verður sýndur í Handboltapassanum.

Við heyrðum í Júlíusi Þóri Stefánssyni þjálfara Gróttu fyrir leikinn mikilvæga í kvöld en Grótta endaði í 2.sæti Grill66-deildarinnar á tímabilinu og var hársbreidd frá því að vinna deildina en tap gegn FH undir lok tímabilsins reyndist liðinu dýrt.

Ljóst er að það verður leikið til þrautar í kvöld. Miðað við fyrri leiki liðanna að þá verður mjög erfitt að rýna í þennan leik og hvað við fáum frá liðunum.

"Leikurinn leggst mjög vel í okkur. Þetta einvígi er búið að vera virkilega krefjandi og skemmtilegt á milli tveggja góðra liða. Við þurfum að ná upp góðri frammistöðu til að eiga möguleika á móti virkilega sterku og reyndu Stjörnuliði sem er með valinn mann í hverju rúmi. Í lokinn vill ég hvetja alla Seltirninga og Gróttufólk til að gera sér ferð í Garðabæinn og styðja við bakið á stelpunum í síðasta leik tímabilsins" sagði Júlíus Þórir Stefánsson þjálfari Gróttu.