Karsten Günther, framkvæmdastjóri DHfK Leipzig, segir það sárt að fylgjast með liðinu glíma við botnbaráttu í þýsku Bundesligunni. Hann viðurkennir jafnframt að ákvörðunin um að selja Viggó Kristjánsson til HC Erlangen í janúar í fyrra hafi ekki verið sú rétta.

Staða Leipzig er erfið, en liðið er í fallbaráttu. Þrátt fyrir að sitja á botni deildarinnar eru aðeins tvö stig upp í öruggt sæti þegar fjórar umferðir eru eftir. Fall niður um deild myndi hafa veruleg áhrif á fjárhag félagsins.

„Breyting á fjárhagsáætluninni vegna falls milli deilda myndi fela í sér grimmilegan niðurskurð fyrir allt félagið eins og það leggur sig. Ég myndi gjarna vilja forða okkur frá því,“ sagði Günther í samtali við þýsku sjónvarpsstöðina Dyn, samkvæmt umfjöllun Handball World.

Að hans sögn er enginn einn þáttur sem skýrir stöðuna, heldur samspil margra atriða þar á meðal sala Viggós. „Það er ekki einhver einn ákveðinn atburður sem hefur úrslitaáhrif. Það er samansafn atburða og salan á Viggó til Erlangen er svo sannarlega einn þeirra,“ sagði Günther.

Günther segir að þegar litið er til baka hefði verið hægt að taka aðrar ákvarðanir, og nefnir sérstaklega söluna á Viggó í því samhengi. Leikmaðurinn hefur síðan staðið sig vel hjá Erlangen og mun ganga til liðs við SG Flensburg-Handewittsumarið 2027.

„Er ég lít til baka hefðum við svo sannarlega getað gert ákveðna hluti öðruvísi. Á þeim tíma tókum við þessar ákvarðanir og við vorum allir sannfærðir um að það væru rétt skref að taka.“

Með Leipzig leikur Blær Hinriksson en hann er á sínu fyrsta tímabili hjá félaginu en hann gerði eins árs samning við félagið en óvissa ríkir hvað tekur við hjá honum að tímabilinu loknu.