Stjarnan tilkynnti á samfélagsmiðlum sínum nú á dögunum að örfhenta skyttan Dagur Sverrir Kristjánsson væri búinn að semja við félagið.

Dagur Sverrir er að koma frá Svíþjóð þar sem hann hefur leikið síðastliðin 3 ár. Áður en hann fór til Svíþjóðar lék hann með sínu uppeldisfélagi ÍR og átti gott tímabil í Olís deildinni á tímabilinu fyrir búferlaflutninga til Svíþjóðar.

Við fengum viðbrögð frá Degi Sverri við að flytja heim til Íslands á nýjan leik og ganga í raðir Stjörnunnar.

"Eftir þrjú ár í Svíþjóð var kominn tími til að flytja aftur heim. Ég er mjög ánægður að hafa skrifað undir hjá Stjörnunni. Mér líst vel á hópinn og þjálfarateymið. Ég er viss um að ég haldi áfram að bæta mig í umhverfinu sem Stjarnan hefur uppá að bjóða. Er orðinn mjög spenntur að flytja heim, kynnast strákunum í liðinu og leggja allt mitt af mörkum. Það verður gaman að spila aftur heima fyrir fjölskyldu, vini og stuðningsmenn félagsins." sagði Dagur Sverrir Kristjánsson.