Óvíst er hvort fyrirhugaðar breytingar á áhorfendastúkum í Kaplakrika verði að veruleika fyrir komandi keppnistímabil.

FH hafði stefnt að því að endurnýja stúkurnar beggja vegna vallarins í sumar, en nú þykir ólíklegt að af þeim framkvæmdum verði á næstu mánuðum. Ástæðan er sú að félaginu hefur enn ekki tekist að finna stúkur sem henta starfseminni í Kaplakrika, þrátt fyrir mikla vinnu undanfarna mánuði.

FH hefur stefnt að því að finna útfærslu sem tryggi allt að 1800 áhorfendur og verið er að skoða möguleika á að hafa svalir í salnum sem tryggja betra aðgengi á fjölliðamótum.

Leitin að hentugri lausn hefur þó reynst erfið. Hafa þær stúkur sem helst hafa komið til greina reynst of fyrirferðarmiklar þegar þær eru dregnar saman. Það hefði áhrif á þá tvo æfingavelli sem eru í salnum og notaðir eru daglega fyrir æfingastarf félagsins.

Á sama tíma eru aðrar framkvæmdir þegar hafnar í íþróttahúsinu. Í vikunni hófst vinna við að fjarlægja núverandi parket af keppnisvellinum og verður nýtt parket lagt í sumar.

Tímapressan er einnig mikil þar sem FH hefur tryggt sér sæti í riðlakeppni Evrópudeildarinnar á næsta tímabili og þarf að tryggja að aðstaðan uppfylli allar kröfur áður en keppnin hefst.

Einar Andri Einarsson, starfsmaður handknattleiksdeildar FH, sagði í samtali við Handkastið að vinna við að finna hentugar stúkur væri í fullum gangi og vonuðust menn til þess að hægt sé að koma þeim upp á næstu mánuðum en ljóst væri að gömlu stúkurnar yrðu notaðar fyrstu mánuði tímabilsins.