Íslenski landsliðsmarkvörðurinn og leikmaður Evrópumeistara Barcelona, Viktor Gísli Hallgrímsson heldur markmannsnámskeið hér á landi í júlí í samstarfi við Handboltaskóla Framtíðarinnar.

Námskeiðið fer fram 13.–15. júlí í Heklu-höllinni í Garðabæ og er ætlað bæði strákum og stelpum fæddum á árunum 2007 til 2013.

Um er að ræða þriggja daga námskeið þar sem þátttakendur fá einstakt tækifæri til að læra af einum fremsta markverði í heiminum. Viktor Gísli mun halda stutta fyrirlestra fyrir iðkendur auk þess að stýra markmannsæfingum í sal. Einnig verður lögð áhersla á sérhæfðar styrktaræfingar sem eru sérstaklega sniðnar að þörfum markmanna.

Þetta er annað sumarið í röð sem Viktor Gísli stendur fyrir markmannsnámskeiði á Íslandi í samstarfi við Handboltaskóla Framtíðarinnar, en námskeiðið í fyrra naut mikilla vinsælda.

Skráning á námskeiðið fer fram á Abler-síðu Handboltaskóla Framtíðarinnar og eru áhugasamir hvattir til að tryggja sér pláss sem fyrst.

Skráning hér.