Britney Cots gekk í raðir Vals í júní síðastliðnum frá ÍBV og gerði þar 2 ára samning. Hún var búin að vera í ÍBV síðastliðin 3 tímabil.

Britney kom fyrst til landsins árið 2018 og spilaði með FH fyrst um sinn áður en hún gekk svo í raðir Stjörnunnar. 2023 gekk hún svo í raðir ÍBV eins og áður segir. Hún byrjaði fyrstu árin sín á Íslandi sem skytta en færði sig svo inn á línu. Auk þess heldur er hún öflugur varnarmaður.

Við heyrðum í Britney og fengum viðbrögð frá henni hvernig árin þrjú á Eyjunni fögru voru og hvernig henni lítist á nýja áskorun hjá Val á Hlíðarenda.

"Þegar ég lít til baka var tími minn hjá ÍBV ferðalag fullt af bæði hæðum og lægðum. Endurhæfingin eftir meiðslin reyndi meira á mig en nokkuð annað sem ég hafði áður upplifað í íþróttum. Tímabilið á eftir var erfitt, þar sem nokkrir leikmenn liðsins glímdu við meiðsli og margir ungir leikmenn voru að stíga sín fyrstu skref í deildinni. Úrslitin voru ekki alltaf eins og við vonuðumst til, en slíkar stundir eru hluti af ferðalaginu. Ég vildi spila eitt tímabil í viðbót með ÍBV því mér fannst ég enn ekki hafa upplifað hinn sanna ÍBV-anda. Eftir svona langa endurhæfingu langaði mig einfaldlega að njóta þess að spila handbolta á ný með samkeppnishæfu liði"

,,Eftir að ég ákvað að færa mig yfir á línuna breyttist allt. Mér fór að líða betur inni á vellinum, sérstaklega í úrslitakeppninni, þar sem ég fann aftur gleðina við að spila"

,,Úrslitaeinvígið var ótrúleg upplifun og sýndi hversu stóran sess kvennahandboltinn hefur í lífi Vestmannaeyinga. Það var einstakt að finna þennan einlæga stuðning frá fólkinu í Eyjum sem hvatti okkur áfram. Því miður tóku atvik sem tengdust nokkrum stuðningsmönnum athyglina frá því sem hefði átt að sitja eftir í minningunni: handboltaleiknum sjálfum. Íþróttir ættu ávallt að byggjast á virðingu, þar sem íþróttafólk getur veitt öðrum innblástur og sameinað samfélög"

,,ÍBV ákvað að segja upp samningi mínum í janúarglugganum. Ég verð að viðurkenna að það kom mér nokkuð á óvart. Ég fór því að velta fyrir mér hvert næsta skref yrði. Á næstu dögum höfðu nokkur félög samband við mig. Það var ekki auðveld ákvörðun því ég fékk tækifæri til að ganga til liðs við frábær félög. Ég er þakklát fyrir það"

"Eftir mikla íhugun komst ég að þeirri niðurstöðu að Valur væri rétta skrefið fyrir mig. Ég þekkti nú þegar nokkra af leikmönnunum og umhverfið í kringum félagið. Valur hefur byggt upp sterka menningu og á sér glæsilegt orðspor, bæði á Íslandi og í Evrópu. Það er frábært tækifæri að fá að ganga til liðs við félag eins og Val. Ég hlakka til að hefja þennan nýja kafla. Nýtt félag, nýir liðsfélagar og nýtt fyrirkomulag deildarinnar. Ég vona að ég geti lagt mitt af mörkum til Vals, bæði innan vallar sem utan"