Mathias Gidsel viðurkennir að Füchse Berlin sé ekki enn komið á sama stað og SC Magdeburg eftir 31–38 tap liðsins í þýska Ofurbikarnum í gær.

Berlínarliðið, sem vann þýska bikarinn á síðustu leiktíð, missti þar með af tækifærinu til að vinna Super Cup þriðja árið í röð. Magdeburg hafði fimm marka forystu í hálfleik, 20–15 og vann að lokum sannfærandi sjö marka sigur.

Mathias Gidsel var hreinskilinn eftir leikinn og viðurkenndi að bilið á milli liðanna væri enn töluvert.

„Við höfum tekið góð skref í undirbúningnum en við erum ekki komin nógu langt í okkar ferli til að geta unnið Magdeburg. Það er sannleikurinn eins og staðan er í dag,“ sagði Gidsel.

Miklar breytingar hafa orðið á liði Füchse í sumar. Lasse Andersson og Dejan Milosavljev yfirgáfu félagið og Nils Lichtlein og Fabian Wiede voru ekki með vegna meiðsla gegn Magdeburg. Gidsel segir þó ekki rétt að hengja tapið eingöngu á fjarveru lykilmanna.

„Auðvitað er hægt að benda á að Lasse Andersson og Dejan Milosavljev séu ekki lengur hér og það skiptir miklu máli. En ég hef alltaf þá skoðun að við séum með gríðarleg gæði í hópnum. Hins vegar voru þau ekki nægileg til að vinna Magdeburg í dag.“

Berlínarliðið er því enn að finna rétta taktinn eftir breytingarnar í sumar.

„Við erum í ferli með unga leikmenn og erum með algjörlega nýja sókn. Það tekur tíma,“ sagði Gidsel.