FH vann sjö marka útisigur á Þór, 37-30, í 9.umferð Olís-deildar karla í dag. FH fer með sigrinum upp í þriðja sæti deildarinnar með 13 stig en Þór er áfram í áttunda sæti með sex stig.

FH-ingar byrjuðu af miklum krafti og komust í 7-2 og síðar 11-3. Gestirnir náðu mest átta marka forskoti í fyrri hálfleik en Þórsarar unnu sig aftur inn í leikinn og minnkuðu muninn í 15-13. FH skoraði hins vegar tvö síðustu mörk hálfleiksins og leiddi 17-13 í leikhléi.

Þórsarar héldu áfram að veita gestunum mótspyrnu eftir hlé. FH komst í 20-14 en heimamenn neituðu að gefast upp og náðu að minnka muninn í eitt mark, 25-24.

Þá svöruðu FH-ingar með tveimur mörkum í röð og náðu aftur betri tökum á leiknum. Þeir sigu fram úr á lokakaflanum og unnu að lokum sjö marka sigur, 37-30.

Einar Rafn Eiðsson og Ómar Darri Sigurgeirsson voru markahæstir FH-inga með sex mörk hvor og Gunnar Kári Bragason skoraði fimm. Jón Þórarinn Þorsteinsson varði 19 skot í marki FH og Ólafur Rafn Gíslason eitt.

Hjá Þór var Bertram Simonsen markahæstur með átta mörk og Hafþór Már Vignisson skoraði sjö. Nikola Radovanovic varði 15 skot.