Valsmenn hafa farið mikinn í sóknarleik sínum í Olís-deild karla á tímabilinu og skorað hvorki meira né minna en 299 mörk í fyrstu átta leikjum sínum í deildinni. Það gerir tæplega 37,4 mörk að meðaltali í leik.

Til samanburðar skoruðu Valsmenn 726 mörk í 22 leikjum á síðustu leiktíð þegar liðið tryggði sér deildarmeistaratitilinn. Það gerir 33 mörk að meðaltali í leik og því ljóst að sóknarleikur Hlíðarendapilta hefur verið enn öflugri á yfirstandandi tímabili.

Valsmenn hafa skorað rúmlega fjórum mörkum meira að meðaltali í leik en á síðustu leiktíð og virðist fátt geta stöðvað markavélina á Hlíðarenda um þessar mundir.

Valur vann Stjörnuna í miklum markaleik í vikunni, 37-34 í 8.umferð Olís-deildarinnar en þar áður hafði liðið lagt ÍBV að velli, 36-28.

Flest mörk í einum leik á tímabilinu skoruðu Valsmenn gegn Víkingi þegar liðið vann sannfærandi sigur, 41-31. Þá skoruðu Valsmenn einnig 40 mörk í tapi gegn Fram fyrr á tímabilinu, sem undirstrikar hversu mikill kraftur hefur verið í sóknarleik liðsins.

Haldi Valsmenn áfram að skora á sama hraða út tímabilið myndu þeir enda með rúmlega 822 mörk í 22 leikjum, eða tæplega 100 mörkum meira en á síðustu leiktíð.

Næsta verkefni Valsmanna verður sannkallaður toppslagur þegar liðið mætir Aftureldingu í Olís-deildinni á laugardaginn klukkan 15:30. Þar verður áhugavert að sjá hvort markavél Valsmanna haldi áfram að mala gegn sterku liði Mosfellinga.