Þrír leikir fóru fram í þýsku úrvalsdeildinni í dag þar sem Íslendingar voru í eldlínunni. Reynir Þór Stefánsson og félagar í MT Melsungen höfðu betur gegn HSG Wetzlar, liði Rúnars Sigtryggssonar, í æsispennandi leik. Þá unnu lærisveinar Guðjóns Vals Sigurðssonar í Gummersbach tíu marka stórsigur á meðan Füchse Berlin vann ótrúlegan endurkomusigur gegn Eisenach.

MT Melsungen vann mikilvægan eins marks útisigur á HSG Wetzlar, 25-24, í Hessen-slag þýsku úrvalsdeildarinnar. Reynir Þór Stefánsson átti góðan leik fyrir Melsungen og skoraði fimm mörk en Rúnar Sigtryggsson er sem kunnugt er þjálfari Wetzlar.

Melsungen byrjaði betur og náði þriggja marka forskoti í fyrri hálfleik. Gestirnir leiddu með þremur mörkum í hálfleik, 13-10, og virtust lengi vel ætla að sigla nokkuð öruggum sigri í höfn. Melsungen komst í 19-15 um miðjan síðari hálfleik en heimamenn neituðu að gefast upp. Wetzlar vann sig jafnt og þétt inn í leikinn og minnkaði muninn í eitt mark, 23-22, þegar fjórar mínútur voru eftir.

Aaron Mensing og Reynir Þór svöruðu fyrir Melsungen og sá síðarnefndi kom gestunum í 25-22 þegar þrjár mínútur voru eftir. Wetzlar skoraði hins vegar tvö síðustu mörk leiksins og fékk tækifæri til að jafna metin á lokamínútunni en Melsungen hélt út og fagnaði eins marks sigri.

Florian Drosten var markahæstur hjá Melsungen með sex mörk en Johannes Golla skoraði fimm líkt og Reynir Þór. Nebojsa Simic átti einnig stóran þátt í sigrinum og varði tólf skot í marki Melsungen.

Füchse Berlin vann dramatískan þriggja marka útisigur gegn Eisenach, 32-29, eftir að hafa verið sex mörkum undir í hálfleik, 16-10. Heimamenn í Eisenach voru mun sterkari í fyrri hálfleik og virtust ætla að koma verulega á óvart. Þeir náðu mest sjö marka forskoti, 16-9, undir lok fyrri hálfleiks.

Eisenach hélt áfram að hafa yfirhöndina framan af síðari hálfleik og leiddi 22-16 þegar 41 mínúta var liðin af leiknum. Þá tóku Berlínarrefirnir heldur betur við sér.

Füchse Berlin breytti varnarleik sínum, fór að vinna boltann oftar og náði ótrúlegum 9-2 kafla sem breytti stöðunni úr 22-16 í 24-25 á aðeins níu mínútum. Gestirnir höfðu þar með snúið leiknum sér í hag og náðu að halda forskotinu út leiktímann.

Mathias Gidsel var enn og aftur maðurinn á bak við sigur Füchse Berlin og skoraði tólf mörk. Felix Aellen var markahæstur hjá Eisenach með tíu mörk. Füchse Berlin er í fimmta sæti þýsku úrvalsdeildarinnar með 14 stig eftir sigurinn.

Guðjón Valur Sigurðsson og lærisveinar hans í Gummersbach héldu áfram á sigurbraut þegar liðið vann stórsigur á Balingen-Weilstetten á heimavelli, 39-29. Gummersbach hefur verið á góðu skriði að undanförnu og vann meðal annars sterkan sigur á Flensburg um síðustu helgi áður en liðið lagði Göppingen á útivelli í vikunni.

Sigurinn í dag var því sá þriðji í röð hjá lærisveinum Guðjóns Vals í þýsku úrvalsdeildinni. Gummersbach fer inn í landsleikjahléið með góðan meðbyr eftir sannfærandi úrslit í síðustu leikjum, þrátt fyrir að liðið hafi þurft að glíma við meiðsli nokkurra lykilmanna.

Elliði Snær Viðarsson skoraði þrjú mörk, Garðar Ingi Sindrason skoraði eitt en Teitur Örn Einarsson komst ekki á blað. Miro Schluroff var markahæstur í liði Gummersbach með tíu mörk úr átján skotum og gaf fimm stoðsendingar.

Úrslit dagsins:

Wetzlar - Melsungen 24-25

Eisenach - Füchse Berlin 29-32

Gummersbach - Balingen 39-29