Marko Grgic, markahæsti leikmaður þýsku úrvalsdeildarinnar hefur skrifað undir samning við Flensburg frá og með sumrinu 2026. Nú er hinsvegar sterkur orðrómur um það að Þjóðverinn, Marko Grgic gæti gengið í raðir Flensburg strax í sumar.

Samkvæmt heimildum Handkastsins eru Flensburg og Eisenach, félag Marko Grgic í viðræðum um kaupverð á Grgic en talað er um að það gætu orðið stærstu fjárhæðir í sögu þýsku úrvalsdeildarinnar.

Marko Grgic hefur farið á kostum með liði Eisenach síðustu tvö tímabil. Á síðustu leiktíð endaði hann sem markahæsti leikmaður Bundesligunnar með 294 mörk en næstur var Daninn, Mathias Gidsel með 274 mörk. Segja mætti að þeir hafi verið í algjörum sérflokki í markaskorun í deildinni því þriðji markahæstur var, vinstri hornamaður Flensburg og danska landsliðsins, Emil Jakobsen með 229 mörk.

Meðal ástæða þess að Flensburg eru tilbúnir að kaupa Grgic strax í sumar fyrir mikla fjárhæð er sú að danski landsliðsmaðurinn, Mads Mensah er orðaður við danska úrvalsdeildarliðið Skjern. Sagt er í erlendum miðlum að hann gæti farið þangað á næstu dögum.

Mensah hefur leikið með Flensburg síðustu fimm tímabil. Danska Instagram-síðan Rygtebors segir ennfremur frá því að leikmaður Skjern, Noah Gaudin sé á leið til stórliðs PSG í Frakklandi.

View this post on Instagram

A post shared by Rygtebørs (@rygtebors)